Day 2A (3/30) 機張 - 大隻夾抵食松葉蟹+長腳蟹

諗住10點起身既我地，12點先起身．．仲要係俾出面落雨聲嘈醒．．．
韓國既天文台都好準，話我地行程既第二日落雨就真係落雨．．
但估都估唔到．．係落足全日，好長氣～～飲香蕉奶頂頂肚先！




今日第一個節目係去機張食松葉蟹～～搵到有三個方法去機張：
方法1. 釜田地鐵站(120) 1號出口, 行去釜田火車站, 再搭火車到機張, 30mins左右
方法2. 海雲台地鐵站 (203) 轉142或239巴士, 50 mins左右
方法3. 海雲台地鐵站 (203) 轉的士, 15-20 mins左右

最後覺得方法1易d穩陣d, 咁就搭去釜田站轉火車~~上面寫1號出口係我上網搵既...
我只知道係同釜田市場同一個出口, 因為我直奔釜田火車站時係經過釜田市場.....

點解可以直奔就到到釜田火車站呢??? 是關搭地鐵時....對面坐左個korail (火車)既職員～
著晒成套制服．．又一齊響釜田站落車．．心諗，呢個時間點都似返工多過返屋企掛！
靠直覺諗都唔諗吊住佢尾，嘩哈哈～～所以就好成功到達釜田火車站～～ｙｅａｈ！



去到火車站～～有少少台灣ｆｅｅｌ！

指引都好清楚，有英文，中文～～

呢度就係買飛既地方．．．我地見咁多人，懶醒咁去左隔離右邊ｄ自動售票機～大家千其唔好咁做！！



有英文～

揀曬正確資料，記得揀Mugunghwa/Economy呀(無窮花號)，平d架!!
之後先發覺，無得入現金既！！！所以大家唔洗行黎自動售票機！
不過反正都係揀曬正確資料，就影底佢，買飛果時隊俾售票員睇～

好成功，其實同售票員講聲去機張都ｏｋ，機張韓文發音就好似普通話咁～2600won@!

我地都幾急, 果時仲有5mins就開車，亦好彩買到呢班，再等下一班好似要25定30分鐘!
再等多班就餓死都似........望一望個屏幕，13:55，去3號月台~~即刻飛奔落去!!!!

 

呢架Mugunghwa線係由釜田去東大邱，釜田係總站，所以唔洗怕無位～
我地搭３個站，釜田 > 海雲台 > 松亭 > 機張，大概半個鐘左右！

有4卡車～D位都唔錯架！

呵呵，就係呢位車長叔叔喇～～我地就係跟住佢行，原來都係呢班車！多謝你～

上網睇人話呢程火車會經過海邊，會睇到靚靚海景～～的確有．．不過加埋雨景～＞＿＜

火車都有得叉電，對於我呢Ｄ電話成日無電既人簡直係恩物呀！不過都要記得帶埋叉電器先得～

黎到松亭站，唔知仲乜停左幾分鐘都唔開車．．唯有影下相打發時間啦！雨點都有雨點既靚～

到左機張喇～簡簡單單既月台！

個站成間屋仔咁，好田園FEEL!

因為班次唔密，可以企響路軌影相，如果好天就更好喇．．此時此刻我對腳已經入晒水！

簡簡單單的小鎮站～

出站後直行5-8分鐘左右, 右邊就係機張市場, 但短短既5分鐘路程....勁勁勁大風!!!!
我地一人一把縮骨遮起碼反左5次以上, 唔係辦法.....路經DAISO買左把直遮~5000WON!

呢度就係機張市場入口喇!!



阿珠媽好堅呀! 我以為係非洲人先會, 原來韓國人都會~!!

入到去未咁快見到蟹店，都係街市～

行到咁上下就見到好多蟹喇！！！我地好似獵物咁，蟹店D人都俯首耽耽!!! 係咁叫我地幫襯!

好驚囉, 所以最後都係搵番街口大間D幫襯, 仲有一定要講價!!!
佢一開波同我地講日文, 好~~就同你用日文講, 好似數字仲未生疏~
佢呢度既做法係幫襯一隻松葉蟹(下)就會送隻長腳蟹(上)~~

當然根本係一條數....本來佢揀左隻大隻D, 個磅標70000WON左右~
佢就開60000WON, 不過我地真係覺得太大隻, 我叫佢拎隻細D~
磅左5萬幾WON, 佢話50000WON, 我朋友好堅一開開40000WON!
哥哥仔話唔得, 最後45000WON成交~~隔離檔都話抵呀!!!

一OK哥哥仔捅一捅隻蟹就即刻丟隻蟹入蒸籠!

然後俾左張飛仔我地, 叫我地上3/F等食!!! 嘩~~幾正!! 有獨立房, 一班人黎開P都得呀!
唔知係咪我地晏左黎, 唔多人~亦似係家庭式作業~BTW, 個侍應好靚仔!!! 韓版旺東城~

首先上左一檯都係前菜, 等多陣D蟹就黎喇~~好興奮!!! 阿珠媽俾我地影下相先~

之後佢就開始手起刀落拆蟹!!! 好似同行朋友唔鍾意拆蟹既人, 簡直係好服侍啦!

阿珠媽真係剪得好快架, 同埋好有技巧, 佢會響蟹腳中間跤位上少少剪一剪,
食果時就可以成條蟹柳咁扯出黎, 啖啖肉, 連個身都可以剪得方便D食~^_^

仲有唔會剪走D肉, 絕不欺場!!!

嘩嘩....我宜家已經好掛住喇.....真正新鮮既海鮮唔需要落任何調味~清蒸蒸曬鮮味出黎!
松葉蟹食好食過長腳蟹, 蟹味濃D, 當然長腳蟹都唔算太差既~~但個人認為長腳蟹D羔正D!

我一定會為左呢隻蟹重臨機張!!! 兩條友食兩隻大大蟹都只係三百幾蚊~~去邊度搵!!!!!

至於蟹蓋呢~~我地一個食, 一個用黎整炒飯~



蟹蓋炒飯~~伴隨豆腐湯! 好味~~

埋單喇~~2隻蟹: 45000WON, 加工費每人2000WON, 1個炒飯2000WON, 1支可樂1000WON!
承惠52000WON, 睇番自製小冊子, 先睇到原來自己有寫兩個人大約5萬WON左右~即係無俾人坤!

呢度就係3/F食事處喇!

呢間就係我地幫襯果間~~阿老闆好好笑容仲拎住隻蟹叫我地一齊影相添!! 後會有期~~