Day 4 (11/19) 富山総曲輪 + 新高穗纜車

因為之前幾日都係早起身，今日就輕鬆d差不多中午先開始行程，11點check out到面既商店街同大和百貨行陣～

総曲輪商店街

商店街會經過大和百貨(富山店)的側門，仲以為呢邊既百貨公司應該無大城市咁多野睇，

我錯了～地下已有齊各大化妝品牌，可能唔太多人都幾好行～

大和百貨

再行前d見到有個活動咁

原來係石頭展覽，仲有得投資，我地都觀賞下

有樣的小石櫈

好得意既汪星人～

最正都係呢隻比卡超，可以打磨到咁真係好勁呀！

石展果邊既門口出去，見到呢度比較出名既建築物，

係圖書館，入面好似仲有陳列玻璃展品～

差不多夠鐘就行番去大和百貨正門(即酒店對面)既巴士站--総曲輪站。初初睇濃飛巴士由富山經新穗高去平湯溫泉既Schedule, 以為一定要去番JR富山搭，但睇到前篇介紹到今日會用到既 奥飛騨まるごと・バリューきっぷ～網中有寫総曲輪出發既價錢，咁即係會經総曲輪？是的，原來濃飛巴士個Schedule未有寫曬全部經既站出黎，其實中途係會經過好多細站架～

富山地方鉄道個網就有寫得詳盡d，呢款由富山經新穗高去平湯溫泉既巴士每日得兩班，一班係7:30, 11:45由富山開出, 4分鐘就到総曲輪，可參看＞http://www.chitetsu.co.jp/?page_id=⋯⋯ ，另有有班16:35富山開出16:39到総曲輪，但呢班就唔經新穗高纜車，平日及休日都有我所搭既11:49総曲輪上車，14:11就會到新穗高纜車。想知會經過咩站就入個網click”☆49”就會出到途經既所有站～

総曲輪巴士站，後面都有個巴士站for短途巴士，總之睇清楚個站有寫"高速バス"就岩架喇！

可能算係長途巴士，都幾舒服，而且仲無咩人，我同阿妹分開一人坐一邊～

原來富山都幾多田，唉，但天氣報告堅準，陰天有雨。

開始入奧飛驒既area，會見到有d地方煙霧瀰漫，即是有溫泉既地方呢～

雖然天氣唔好，但卻睇到山巒中既霧氣，又係另一番景緻。

仲有不少紅葉呢，水平線望又有不同感覺～
巴士超準時到，可惜既係去到新穗高纜車時落起大雨，影唔到門口就衝左入去～
新穗高高空纜車分為兩段，第一段由地面"新穗高溫泉站"到"鍋平高原站"，約4分鐘。

第1高空纜車

到鍋平高原站後行去白樺平站，望到旅客中心，旁邊仲有足湯，奈何愈來愈大雨，無行落去～

白樺平站入面，是暖爐麼？
第二段高空纜車就係由白樺平站～西穗高口站，係日本唯一既雙層纜車～的確雙層巴士我地就見得多，雙層纜車都係第一次見～搭7分鐘左右就可以登頂。

第2高空纜車

天公不造美。。。愈來愈朦～

霧中樹林

上到頂。。。乜都睇唔到～

睇唔睇到雪人前面張相，好諷刺呢～anyway 呢度有人幫手影相！當然佢都會用佢架機幫你影，買唔買悉隨尊便！

本應會睇到連綿起伏既雪山，可惜天氣唔好，的確係失望，但我寧願尋日既立山好天，就俾個藉口自己有機會再黎吧！提一提，呢度除左鍋平高原站，其他都有餐廳同手信店，有d仲有飛驒牛食添架～詳細可瀏覽官網。

因為天氣麻麻，決定唔響度食早些搭巴士去平湯溫泉到旅館check in~由新穗高纜車到平湯溫泉約30mins，是晚入住平湯溫泉 -岡田旅館。和樂亭。

#我的旅遊日記 #2016日本中部6天賞楓賞雪之旅 #富山 #総曲輪 #奧飛驒 #奥飛騨まるごとバリューきっぷ #濃飛巴士 #新穗高 #雙層纜車 #新穗高溫泉 #鍋平高原 #白樺平 #西穗高口 #shinhotakaropeway #飛驒高山 #平湯溫泉 #岡田旅館 #和樂亭

平湯溫泉 - 岡田旅館。和樂亭Okada Ryokan Warakutei

:::2016 日本中部6天賞楓賞雪之旅::: 酒店一覽  

Night 4 : 岡田旅館。和樂亭Okada Ryokan Warakutei

Booking through official website --- 出現過一個狀況！我BOOK同一日子～用網頁中文版SHOW FULL左，但於網頁日語版反而BOOK到～所以如遇到同一情況唔好咁快氣餒，可以去日語版面試試先！

Price: *JPY 52,920 per night 一泊二食包早餐及晚餐【飛騨牛三昧プラン】
可選擇網上俾錢或「現地決済」＝到時先俾錢～CHECK OUT時先俾，收信用卡的！
Distance: 平湯溫泉巴士總站步行約5 mins
Wifi: Good
Comments:
- 傳統日式溫泉旅館
- 岡田旅館分為本館及和樂亭, 和樂亭是帶有私人露天風呂的全和式客房, 只有10個這類型的房間, 所以價錢亦比本館貴
- 有專人帶到客房並作細心的講解
- 早餐和晚餐指定地方享用, 非常豐富
有圖有真相～～請看圖下的描述吧！

是日陰天兼有毛毛雨，冒著雨由平湯溫泉駅步行至岡田旅館，當時大概5PM左右，天色開始昏暗還有點霧氣及溫泉湧上來的蒸氣，沿途都是朦朦朧朧的～

入到酒店就到FRONT DESK CHECK IN，不要誤會沒人，只是我襯員工入去拎野時影相～員工英文都不錯。因為我訂的是一泊二食，隨即問我想幾時享用晚餐，有6點或者7點半選擇，是關之前只食了很少野，要求了6點～其他已是5點幾，我都問前台是否可以安排到，太趕就下輪吧～店員氣定神閒說沒問題～

超日式的LOBBY～掛了很多飛驒寶寶！

仍是LOBBY～地毯的櫻花圖案好靚！！旅館亦有手信鋪～就是在這旁邊，但唔記得左影=P

之後有位叔叔帶我地去房間，初初仲諗大到要帶咩？少不更事，的確要～沿著走廊都有很多這類擺設。

轉幾個彎終於見到和樂亭的牌喇～

不厭其煩講多次～岡田旅館分為本館及和樂亭, 和樂亭是帶有私人露天風呂的全和式客房, 只有10個這類型的房間, 所以自成一格有自己的入口。

入去當然係溫泉旅館指定動作～除鞋！放番響自己房果格～當然有拖鞋俾你換，或者著襪亦得～

以為入到和樂亭範圍好快到，非也～好在有叔叔帶住，沿途的裝飾好別緻！

呢個爐係可以用，每個角落都謀殺菲林～SOR，而家係謀殺SD CARD位先岩！

行行重行行

仲要落樓梯～～有冇咁大先！

呀～～落完樓梯終於到了！我地間房叫葉月，就係張相右邊門口呢間喇！

第一次拍片介紹，請多多包涵喔https://www.facebook.com/MyTravellingBlog/videos/703754583124621/

執整下歇一歇就去食飯～九曲十三彎出番食事處「櫸」享用晚餐！去到仲傻傻地同人講我係邊間房，我到第二朝食早餐先知右下角有我個大名～哈哈。。好白痴～

這是我訂的【飛騨牛三昧プラン】厳選飛騨牛120gステーキ＆すき焼き会席，提提MENU會按時節或酒店安排而有所更改～一邊食一邊上，上到唔知食邊樣先。。。哈哈！

咁岩負責我地果檯係識講普通話既女侍應，都會略略介紹菜色。而食得慢既我地都叫佢可以慢慢上，另外都有叫佢俾少個飯，反正食唔曬唔好浪費嘛！

基本上樣樣味道都好好～最正當然係下面兩個飛驒牛啦！一個係鍋上，點少少蛋汁，超正！另一個就係鐵板上的飛驒牛STEAK～入口即溶！記得上檯好快快品嚐，影兩張相好食喇，如果唔係OVERCOOK就嘥曬架喇～

食事處的裝潢都好細緻，用水車做擺設，咁有格調食飯時心情都好D～

一起身，終於見番個藍天～日本天文台堅準！

有咁正既溫泉起身緊係要浸多次啦～唔知點解覺得尋晚D水熱D？還是適應左？

尋晚凍凍地只係浸左一陣露天風呂，襯朝早有些少太陽再浸多轉先^o^

浸完就出去食早餐喇～都係包埋！於尋日晚餐同一個包廂食～朝早有陽光感覺又唔同左。

日本人的確對早飯好講究，對於一向少食早餐既我，簡直係我平時LUNCH既份量～好在尋晚6點就開始食晚餐，今朝可以食到～

好FUSION～除了日式各小食，仲有西式火腿及沙律，都幾好食架！而右下角有D似刺生，原來係仿魚生的蒟蒻，不過淡淡的沒什麼味道

還有多料的面豉湯，醃漬物，白飯，水果甜點～

影番張藍天下的岡田旅館，今次有點來也匆匆，期待下次再臨～

*Price for reference only which’s subject to up-to-date currency rate & date you stay.
#我的旅遊日記 #2016日本中部6天賞楓賞雪之旅 #日本 #奧飛驒 #平湯溫泉 #岡田旅館 #和樂亭 #OkadaRyokanWarakutei #露天風呂 #私人風呂 #onsen #hotspring #一泊二食 #飛驒牛 #飛驒高山

:::2016 日本中部6天賞楓賞雪之旅::: 準備篇!!!

其實無打blog既呢段日子去了不少地方留底腳毛，除了「鄉下」日本外，仲有泰國華欣、越南胡志明市、新加坡睇F1等等。左思右想都係想先寫11月時去的日本紅葉之旅，雖然去過差不多十次日本，但往往11月都會遇上工作上既旺季而請不到假，直到今次剛好遇到大客取消meeting先促成今次超難得既紅葉之旅，第一次睇紅葉，亦是第一次去名古屋呢！所以選擇了成為出山之作，而其他會一一後補～嘻！開始～～～

<機票篇>

雖則話就話可以請假，但話曬到年尾假期都用得7788，加上今次想慳於機票上就決定搭廉航，搭過廉航就會知道前一日後一日既價錢都可以有幾大既出入，左就右就confirm了HK Express 2016年11月16-21號 - 6天日本中部賞楓賞雪之旅！

16 NOV 16 - Dep. 0915 Hong Kong Int'l Airport ---> Arr. 1345中部国際空港

21 NOV 16 - Dep. 1330 中部国際空港 ---> Arr. 1715 Hong Kong Int'l Airport

<行程篇>

今次既同行者係阿妹，係佢第2次去日本，佢有兩個要求～1. 睇紅葉 2. 去立山黑部 3.白川鄉，其他我發板，好好好...即是風景遊！6日本身要去立山黑部已經有少少緊迫，而自己亦加左個挑戰俾自己...就係其中第2晚要睇CNBLUE (是的，網主係情迷小鮮肉)，即是要第3日先可以出發向北出發，所以做左好多資料搜集睇睇要點先可以Squeeze in曬想去既地方呢? 好多人都會先去高山停一晚第2朝先繼續向富山&立山黑部出發，但我根本無時間再響高山停一晚，而且我係鐵道遊，如果富山入的話我就算幾早由名古屋出發都完成唔到立山黑部全個行程，救命呀呀呀～最後發現反過來由黑部入立山出的話，反而可以完成整個行程(詳情會另開一篇講述及pass之利用)，顛完冷靜落黎終於度掂了以下行程：

Day 1: 香港 >名古屋 > 名古屋城 >名花之里 > 名古屋

Day 2: 名古屋 > 香嵐溪 > CNBLUE 5th ANN. ARENA TOUR 2016 -Our Glory Days

Day 3: 名古屋 > 松本 > 黑部立山 > 富山

Day 4: 富山> 新穗高> 平湯溫泉

Day 5: 平湯溫泉 > 高山 > 白川鄉 > 名古屋

Day 6:名古屋 > 中部国際空港> 香港

<酒店篇>

6日之間其實跨越好幾個縣，自然酒店都要分幾間住，今次有些少貪心，想住住傳統既溫泉旅館，本想去三大名泉之一既下呂溫泉，但行程上既安排下最後決定去平湯溫泉，最後分了3間酒店:-

Night 1,2,5 : 名古屋站前萬寶龍酒店 Nagoya Ekimae Montblanc Hotel

Night 3 : 富山御宿野乃天然溫泉飯店 Toyama Oyado Nono Natural Hot Spring

Night 4 : 岡田旅館。和樂亭

*詳情請參看酒店一覽

#我的旅遊日記 #2016日本中部6天賞楓賞雪之旅 #日本 #名古屋 #中部國際空港 #名花之里 #香嵐溪 #cnbluearenatour2016ourglorydays #黑部立山 #立山黑部阿爾卑斯山脈路線 #白川鄉 #天然溫泉富山劍之湯御宿野乃 #富山 #飛驒高山 #新穗高 #平湯溫泉 #岡田旅館和樂亭

Facebook專頁。我的旅遊日記。同步更新 - https://www.facebook.com/MyTravellingBlog/