。26-27 NOV 2011 - Pre-Birthday Celebration Trip。

突然又已一年...話咁快又大一歲~~今年係最後一年以單身身份去過生日!
朋友們亦好有心搞左個11行人澳門慶生團, 為我同另一個朋友齊齊慶祝!

對上一次同呢班朋友去澳門已經係5年前, 還記得凌晨4點仲響議事亭前地留連~
5年後大家都出投身社會, 的確亳不容易約到咁多人齊齊出trip, 實在難得! 多謝晒~

雖然個個都知我熟澳門, 但因為我生日既關係都盡量唔俾我幫手動腦筋~~
唯一有少少出事就係酒店, 今次住金都酒店, 雖然係五星級, 但地點唔方便...

2:30pm出發, 響氹仔落船之後...miss左架金都shuttle, 要等30mins...
好彩宜家隔壁多左銀河, 唯有搭銀河shuttle~不過行去金都要10mins!!
check in先...還可以, 但床舖及床size未至於五星級...同駿景d床..一樣=,=

應有的都有~~

等shuttle過番澳門半島再去美食節, 我地包左大半架shuttle bus!!!

去到碼頭的士排長龍....其實都預左...好彩search定有32號巴士去旅遊塔, 好彩亦上到車! 到達!!!

同往年一樣都係要買代用卷~~但因為我地只有1個鍾多少少時間之後就要睇水舞間, 快快快~~

分左兩group人去搵食~~~韓式牛油帶子~~MOP 30 4隻~~正!!

葡式白酒煮蜆....MOP 35~~多就多喇, 不過唔知係咪加水加水再加水...淡左D囉~~

MOP 20 韓式壽司, 我麻麻地....

印度薄餅!! 今年有榴槤味~~堅有榴槤肉~~MOP 40 , 足料大件超好食!!!
不過其中一個朋友原來唔食榴槤...但又唔知道係榴槤味...一啖食左......賴野~~哈!



平靚正 - MOP 35 咖哩雞包~~包又脆, 雞又嫩, 咖哩汁又香濃~~又平!! 簡直係無得彈~~

亞洲各地都好支持日本, 美食節亦都唔例外, 今年特別響西灣湖搭條日本村, PRAY FOR JAPAN!!

的的確確好多日本人黎擺檔, 亦都有日本人黎支持! 日本村係非常非常多~~好認真的築地市場!

因為日本村太多人同我地趕時間既關係, 只可以幫襯D 無咁多人~
呢個係芝士三文魚丸, 我唔食熟既三文魚, 所以無食~ 朋友話好食!

仲有唐揚~~魷魚圈+帶子仔....看似平平無奇~~但係一食就停唔到口喇~~香口好味! MOP 40~



響美食節4個人用左300大元, 都可以接受~不過事實上比往年貴左, 通帳無辦法啦!
時間關係要閃人喇~~之前睇新濠website見到新濠有shuttle來往旅客塔, 50mins一班~~
不過就唔到時間跳上的士返新濠天地, 水舞間係呢個TRIP既重點之一!!!因為我黎咁多次都未睇過~

等開場!

我地睇平果隻$480, 平都要$480........所以側少少, 不過都ok~~

場內可以影相, 不過唔可以用閃光燈, 亦唔可以拍片~~

唔講咁多, 睇相吧~~

其中精彩既一part  - 打鞦韆花式跳水!!!

另一精彩既一part!! 花式電單車~~~

超勁!!!!!



睇完已經9點半, 費事過番澳門半島, 去左官也街睇睇有冇野食,
不過都夜得番誠昌開緊~~鮑貝扒西蘭花~**因為多人全部都轉左中碟**

椒鹽鮮魷! 唔錯~~

炒花甲, 正正常常

醬爆雞, 好惹味!

水蟹粥(大)....麻麻地...個人認為六記仲好食! 埋單每人$60左右~~食飽就返酒店發顛~~

DAY 2~~導遊日! 11人CHECK OUT 浩浩蕩蕩行番銀河睇鑽石~
然後自由活動一小時, 食野既食野, 玩兩手既玩兩手~~

離開氹仔就過番澳門半島喇~~因為有D團友好耐無黎, 食番D地道野! 瑪嘉烈葡撻~~

朋友嬴錢請食撻~~8蚊個~~90蚊一打!!!!!!! 但唔知點解半打熱半打凍囉.....熱好食好多!!

之後朋人想買金錢餅, 就帶佢地去左買~~



順便響隔離買胡椒餅食~~

本來都諗住去東望洋燈塔, 可惜唔夠時間~~就去一去大三巴黎張到此一遊!!

之後去左巷仔食牛什同檸檬車露~~順便去埋大聖堂影下相~



主要都係黎坐一坐, 不過到宜家都覺得呢個位寧捨唔同, 好舒服! 好似空氣都流通d!

咁上下時間就過番氹仔地堡/官也街喇~~天娜搬左入d巷仔, 好采上黎我見到搬左咋!
是關我同生日既朋友都鍾意食榴槤雪糕, 順理成章做左我地既生日cake, hahaha~

之後就係自由活動買手信時間, 朋友們book左山度士食我地既生日飯~=) p.s.一定要訂檯!!!!

價錢都acceptable!

叫完之後上菜好快~~首先有餐前包包~~



葡式炒蜆~~~都唔錯! 不過我都係覺得船屋好食d!

焗鴨飯~~

招牌葡式焗乳豬, 果然係招牌!! 響澳門食咁多間葡國菜暫時最好食!

葡汁燴羊肉~~~正!! d汁配埋餐前包包仲正!!

燒牛仔骨~~齋燒就好難唔好食既, 勝在燒得岩岩好! 份量足!

葡式豬柳...麻麻地...d豬好鞋...卷住d咸咸地既肉, 食唔慣~~~

Sangria 水果酒



cheersssss!!

。10 FEB 2011 - 辛卯兔澳門一天遊。

公司初十先開市．．仲要扣annual．．所以我要充實我既新年假唔可以白過！

阿妹之前講過話想去澳門HEA下影下相，所以其中一日就過大海喇～
今次即日來回，所以想去程買平D，巨龍HK$88單程！
如果佢有夜航就好啦！好可惜偏偏就唔會兩全其美 ><!

不過都好驚險! 我地想搭 11:30am 船...但 11:10am 先到信德...
仲要...提款>> 上3/F搵巨龍counter >> 買船飛 >> 過關...
好勁!! 11:20am 就已經坐定定響船喇, 好彩阿妹搵得快咋!!

so far 我覺得巨龍都唔錯丫!!

船倉樓底高，座位ok！

響氹仔碼頭落船，過埋關就去買走既船飛先～再搭葡京shuttle bus過番澳門果邊!

行過議事亭前地，嘩～～超誇超多既新年裝飾！但非常有氣氛！

黃枝記外的靚桃花

食飽飽就開始我地既漫無目的既喪hea四圍行之旅，
中下中下中左上教會公署(左) and 大聖堂 (右)。

對出的前地

之後屈番落盧家大屋條巷仔，原來有好多小食同台式飲料架！

簡介：盧家大屋，是著名商人盧華紹家族故居，富甲一方的盧華紹來自廣東新會，發跡於澳門。
他為澳門留下了仿照廣州西關大宅建造的盧家大屋，以及富有蘇州園林景色的盧廉若公園。
盧家大屋是澳門少數較為完整的中式大宅建築，同時體現了澳門民居中西合璧的特點。

大屋高兩層，以厚青磚建造，是晚清時期粵中民居溫婉纖細建築風格的典型。
屋內佈置多個天井，便於通風和採光。

內部融合中西方裝飾材料和手法，下圖就是西式的彩色玻璃窗。

地址：澳門大堂巷7號
開放時間：09:00-19:00
每週休息日：星期一
免費入場

之後諗住去食上次食唔到既牛什粥，點知無開．．失望～
同阿妹講話呢條街舊舊地但好有味道就不自覺咁行行行～

原來之前阿妹就係想黎呢條街睇下舊野，點知上次同朋友黎搵唔到～今次就終於黎到喇！

d街名真係好趣!

阿妹之前想黎果次做過research 話呢間既荳腐花好味就入左去試喇!

好家庭式的店舖，凍荳腐花MOP 5.5，熱荳腐花 MOP 5。
首先係好有荳味，個"糖水"好得意，唔似平時食既糖水，好似係有少少荳漿水，
但又甜甜地！食食下仲會有薑汁味，好surprise，係食過比較特別既荳腐花！

岩晒阿妹影既舊巷，好靚既陽光！

跟住又搵到阿妹另一間之前想試既椰子冰

睇黎係好老字號既兩囍椰子舖，嫁果陣洗唔洗黎買番對？

椰子冰 MOP 13，其實我覺得貴左少少，不過勝在夠懷舊！好襟食，味道唔錯架！

行行下見到小明髮型屋，笑死我．．小明除左上廣州，原來仲開左髮型屋～

穿下穿下去左白鴿巢前地，搭番巴士落新馬路，中途經過二龍喉公園～
但睇到既時候已經MISS左，仲諗住去東望洋燈塔，但又驚個纜車收左～
下次一定要去到！！！落番亞馬喇前地再轉去氹仔官也街既巴士！好靚～

試左呢間既木糠布丁

MOP 28

個櫃有個好大大大既木糠蛋糕呀！肯定好貴～

當然又係少不了食天娜既榴槤雪糕，又行左去龍環葡韻食同影下相！

本來想去番葡韻食忌簾馬介休，點知無開！！！就去左木偶食～

呢間分店個裝潢唔錯，吹水好地方！

加拿大3A牛肋骨-MOP 108 OR 118...咪就係普普通通既燒牛肋骨，唔刃，味道尚可～

半份馬介休球-MOP 40 (6粒)，都唔錯，好多馬介休絲，味道有少少似咖哩角～

葡式白酒煮蜆-MOP 88。份量都唔少，但蜆既size比平時響其他葡國菜既細，味道尚可～
成餐黎講，so far 以西餐黎講都可以接受，味道還可以，但就唔係好feel到葡式既味道。

時間咁上下就去新濠再轉shuttle去碼頭!

見到五彩繽紛既音樂噴泉!

應承左阿妹下次一定要黎睇水舞間! 聽好多人講都話好好睇~

入面睇出黎見到個好靚既瀑布，仲突登走出去影～哈哈～之後就閃人lu!!

一日真係過得好快，雖然好似唔係去左好多地方咁，但悠悠閒閒咁都唔錯丫～
已經諗定下次或者下下次要去既地方：路環，東望洋燈塔，睇水舞間．．．