Day 2A (11/17/16) 紅葉名所 - 香嵐渓 (香嵐溪)

今次有幸11月甩到身黎日本，賞紅葉係must do list入面既一大項! 黎得睇緊係想睇最靚最震撼！
不過原來無咩朋友曾經響名古屋睇紅葉，多數都係去東京高尾或京都等地。。。
唯有自己做功課啦！見到weathernews.jp 除左有櫻花情報之外，
紅葉都有 > http://weathernews.jp/koyo/ , 同櫻花一樣都有予想, 名所介紹等等資訊,
當然紅葉季節前後個網先會有野睇, 如要睇櫻花情報可瀏覽> http://weathernews.jp/sakura/ 。

無論weathernews, 旅遊書或網上爬文，都全推香嵐溪，說是日本中部紅葉名所之一，
而且用公共交通工具不算很難去(是關有d係要自駕先方便去到)，總之就決定去香嵐溪喇！
香嵐溪位於名古屋近郊的足助町，搵搵下原來足助町都有自己的觀光網頁>> http://asuke.info/ ，
入面仲有為期1個月既香嵐溪紅葉祭的資料 > 香嵐渓もみじまつり ,
整個11月都係該處的紅葉祭, 有不同既活動介紹。

除了活動當然有教點去啦，好易就搵到點去既方法，可click >http://asuke.info/access/,
我就採用<名鉄名古屋本線　東岡崎駅下車、名鉄バス岡崎・足助線（足助行）約７０分>呢條Route去:-
名鉄［名古屋本線］：名古屋 ---> 東岡崎 ，約30 mins
名鉄バス岡崎・足助線［足助行］：東岡崎 ---> 香嵐溪 ，約70 mins
連Lunch逗留時間：4.5 Hours

到達東岡崎向有巴士站的方向行，搵一搵去足助既巴士，響4號站上車，
初時會見到不同的巴士埋站，疑惑係咪呢個巴士站呢？佢一個站係俾唔同既巴士上落客，
所以照排隊就可以，要上巴士既人就會自動向前上車，去足助要成粒鐘，巴士亦唔係多位，
排好就唔好郁喇，企成粒鐘都幾係野架！仲有，巴士一個鐘先得一班，
有時甚至兩個鐘先一班，plan行程時務必要睇準時刻表呀！

我係8點45左右到東岡崎，搭09:10既巴士，基本上響東岡崎名鉄站買左支野飲就去排定隊，
9點開始就愈來愈人了。好在都有位坐可以訓下，另提提足助町只係小鎮，
一入d郊區位只係來回各一條行車線，加上紅葉旺季好多日本人都會自己揸車去，
所以有心理準備會塞車呀～

提提香嵐溪唔係總站黎架，唔好訓過龍喔～1個鐘鬆d終於到了！

落車之後未見到網上圖中既香嵐溪，落車就望望巴士站附近既地圖

要過番對面馬路，再行前少少，見到呢個牌就岩喇～

行前些少就見到呢個景喇...嘩，幅畫咁呀！

好大棵呀！好慶幸遇到見頃既時候～

行幾步就要停一停，用眼睛感受一下，再影兩影～真係好靚！

都不少日本人帶家人黎，見到超可愛既日本孖女～

中間既河川係有樓梯可以行落去，不過要小心慢慢行呀！

小心翼翼行到中間少少，左邊一整排紅噹噹的楓葉。

沿住小徑慢慢行入去香嵐溪既中心地帶...

黎到待月橋再加紅葉，是但影都好似postcard咁靚！

慢慢再行入去，原來入面仲有好大地方，呢張相紅橙黃綠都有～

好多人除左帶小朋友都會帶狗仔黎，著曬靚衫黎排排坐影靚相～

背影都好得意，哈哈

最開心係捕捉到呢張，影果時唔覺佢笑，之後先睇到佢笑笑，再加上紅葉背景～好滿意！

愈行入愈多手作攤檔仔

橙紅色又有另一種靚，如響香港又會唔會停落黎坐響度感受大自然呢？

再入D見到有好多人圍住個台，有表演？

原來係馬騮仔呀，好似以前電視做既阿笨與阿占既阿笨咁著曬衫仔～

開始喇！

去片！好叻架～
https://www.facebook.com/MyTravellingBlog/videos/712598582240221/

～香嵐溪～

再行入D有好多小食檔，手信店～

呢個就係香嵐溪2016紅葉祭既MAP～

入面連新鮮疏果，醃漬物都有得賣～

有更多既手作店，好在預鬆左時間，初初以為黎到睇睇風景食下野就走，但可以睇既野比想像中多呢～

好得意既手繪～

少不了手信啦～好多都係楓葉形狀既菓子或蛋糕仔～

開始行番出去，有少少落葉，好有秋意呢～但對我地黎講已經係凍凍地。。。

丫，點解人地既郊區會無蚊既？

真係靚到唔想走。。。

但因為肚餓喇，搵食先～響對面行既時候已經target左呢間有平台既餐廳～

除左平台位，都有室內～

呢度有飯既定食亦有麵食～我地簡單叫了蕎麥麵同烏冬，雖然簡單但清清地幾好味！

主要係對住呢個景食就加曬分～

另一邊～

嘩哈哈～經過見到好正咁，幫襯左兩串：P

行番出去大路，未行到出去前，原來仲有個小市集～另一邊有個好大既停車場，仲停左好多旅遊巴～

又有章魚燒，燒粟米，串燒，燒餅等等，最後悔係行到轉角見到原隻蟹湯，不過已經趕唔切食～＞_＜

行完就去番大路搭巴士返番東岡崎～記得要按時刻表睇緊時間呀！

#我的旅遊日記 #2016日本中部6天賞楓賞雪之旅 #名古屋 #東岡崎 #足助 #香嵐渓 #香嵐溪 #紅葉 #楓葉 #紅葉名所 #見頃 #紅葉祭 #楓葉祭

Day1C (11/16/16) 矢場とん味噌豬扒

回到名古屋已經係9:50pm，即刻睇睇個名古屋必食名物list中有冇邊間未last order，味噌豬扒及鰻魚飯都係10pm last order，本來想先食鰻魚飯，但當時位置比較近矢場とん味噌豬扒，所以即衝上去名鉄百貨店本館9樓！！

矢場とん (名古屋駅名鉄店)
電話番号 (052)563-7373
住　所 名古屋市中村区名駅1-2-1名鉄百貨店本館9階
営業時間 11:00～23:00 (L.O.22:00)
* 分店可於以上連結找到～

剛剛好在last order前入到店～

只有3檯客，為免阻人收工～好快手揀好order埋～有中文版MENU！

向上望望，連天花板都係呀豬兄！

名副其實的豬肉佬～

因怕食唔曬，叫左一個SET + 一個單點～

叫左寫住推薦的<鉄板とんかつ>定食 1,836円，果然是人氣產物，初初以為淋左醬汁上去會令到D豬扒唔脆～係我太天真了！仲係好脆，豬扒半肥瘦，跟味噌汁好夾！墊底既菜絲好甜，再吸埋D味噌汁會忍唔住食完一啖又一啖！

另外單點了炸物盛合～ロースとんかつ (豬扒) + 蟹コロッケ(蟹肉忌廉波波) + 海老フライ (炸蝦)，蝦比預期好味，豬扒就鐵板比較鬆化好味，反而蟹波就普普通通。

連飯都好好味，日本米堅粒粒分明～睇個碗就睇得出幾重視自己品牌，從事相關陶瓷產業既我就知道要做呢款碗都唔易呢～
#我的旅遊日記 #2016日本中部6天賞楓賞雪之旅 #矢場 #矢場とん #味噌豬扒 #名古屋名物 #名古屋必食

Day 1B (11/16/16) なばなの里 (名花之里)

回到名古屋，向近鉄方向行，放心！名古屋駅有地下街貫穿不同鐵道，而且有好多牌俾你跟住行，好快就去到近鉄名古屋～下一站なばなの里 (名花之里)！由近鉄名古屋出發大約搭30mins鐵+10mins左右既接駁巴士就會到達。雖然由名古屋過去唔算遠，但其實已經跨左去三重縣架喇～

咁點解要搭近鉄呢？因為響網頁見到有個［なばなの里 イルミネーション 近鉄電車＆バス割引セットきっぷ］係呀～係呀～又係我最鍾意既優惠套票～打開連結就會見到細節，簡單來說，一個價格已包含 1.近鉄來回票 2.接駁巴士來回票 3.名花之里入場券 4.JPY 1,000金券（於指定商戶才可使用），而這套票不只是於名古屋發售，由不同地方去都可以買這套票，如京都，奈良等，當然價錢會有所不同，由近鉄名古屋出發的票價就是JPY 3,170 ，於近鉄賣特急劵的窗口就可以買到。

連結內有部分近鉄及接駁巴士的時刻表：なばなの里について、電車・バス時刻表
呢度就係整個優惠套票有既車飛，入場券等等～

半個鐘頭後就去到近鉄長島駅再按指示行去接駁巴士站，已有燈飾佈置WO!

呢個就係等接駁巴士既站，都有唔少人在等喇！
略略講下なばなの里 (名花之里)係乜東東先，なばなの里 (名花之里)位於三重縣長島渡假區， 佔地23萬平方米， 係日本最大的彩燈節之一，仲會有時令既花花～但請留意開放既日子，因為唔係全年開放~我剛好遇到呢期既開放period 2016.10.15 - 2017.05.07! 另提提平日跟假日既開放時段亦有所不同，詳細可以到官網瀏覽～

 なばなの里 (名花之里)
ｔｅｌ： +81-594-41-0787
地址： 三重県桑名市長島町駒江漆畑270
開放時間： 9:00AM - 9:00PM (Weekdays)*Hours of operation may vary by the season. http://www.nagashima-onsen.co.jp/na⋯⋯
搭巴士沿途都幾黑，有些少民居咁啦，逐漸逐漸先睇到愈來愈多燈～好！落車～

嘩! 滿佈藍色燈既花園, 好夢幻呀!　官方叫光之雲海～

餐廳門口既佈置都落足本! 不過時間緊迫無響園區內食野...P.S. 套票既金劵可於餐廳使用~

估唔到連足湯都有, FREE!

究竟d燈點樣掛到咁高?

行到中間少少有個湖, 仲有月光點綴...

當日天氣好, 風不大, 靜靜的, 湖面成塊鏡咁呀

而燈光係會漸漸的變色, 唔同色有唔同感覺~

見到個類似香港海洋主題樂團的轉轉塔, 呢度呢個叫「アイランド富士」, 都係可以上去360度看看附近既景觀! 不過是收費的~~成人：500円, 而中學生以下：300円, 3歲以下FREE。開放時間為 10：00～19：00, 不過套票金劵唔用得喔~

話明名花之里, 少不了有花, 範圍好大仲見到有溫室, 相信有日照時的花園會更漂亮~

行行下終於黎到打卡位 - 光之回廊, 真心靚!

不過影相有少少難度....haha

有種無盡頭的感覺, 的確好讚歎, 而家燈是花花型的
讚歎完出到黎有個好大既螢幕都係用ＬＥＤ燈組合而成,官網寫 高さ約 30 m 横幅約 155 m ！出來剛好播著名為［大地］的片段，音樂都配合得好正，以下是節錄：
 https://www.facebook.com/MyTravellingBlog/videos/706444646188948/


月朦朧鳥朦朧

行去邊一邊，有另一條光的隧道，今次唔係花花，係有葉～

而且仲會不停變色，同頭先既感覺又好唔同

最另我以想不到就係，有紅葉！鏡池，水中的倒影才是正字

估唔到呢度都已經睇到咁靚既紅葉，仲要係夜賞紅葉，成幅畫咁

一直以為紅葉好似手掌咁大，原來比想像中細架～

影不停。。。
其實行到最後仲有手信店架～最後影到相機無電無影到，手機就留電黎影埋之後餐飯。。。

近鉄長島駅，不是特別大的站，沒想到附近有這大型的彩燈節呢！

#我的旅遊日記 #2016日本中部6天賞楓賞雪之旅 #名花之里 #なばなの里 #光之回廊 #紅葉 #長島 #三重縣

Day1A (11/16/16) 名古屋 + 名城公園

大概下午二點鬆D就到達中部國際空港～YEAH！遇上好天氣！

點解日本既天總係特別靚～

機場看似唔太多人，但過關都打蛇餅用上大半個鐘呢！

三點才到中部國際空港名鐵駅～

名鉄：中部國際空港 ---＞名古屋，約28mins *快速急行都只係35分鐘～

好在剛好趕到15:07的特急班次～

欣賞著沿途風景～沿途都見到有少少紅葉已經興奮不已！

座位前放了些雜誌，紅葉時期當然介紹紅葉名所～見到其中一個名所個名完全笑左！嘩哈哈～希望總有一天可以去睇睇XD

半個鐘後到了名古屋喇～其實之前做research都見到比較多人住'榮'，但考慮到要北上都係響名古屋駅搭JR，唔想轉來轉去所以最後決定住番名古屋，以便直接搭名鉄、近鉄、JR 及名古屋市营地下铁。

又幾繁榮WO!

因拖住行李及搵路，去酒店5分鐘既路程都用上15分鐘先到名古屋站前萬寶龍酒店 Check in，整頓一下4點左右就出發～本身想去名古屋城，但去到應該已閂門，閂16:30~不過睇到名城公園都係紅葉名所之一就照去睇睇吧！

名古屋市营地下铁：名古屋 ---> 市役所／名城公園，約10mins

不過無諗過5點就已經開始日落～

開始天黑，有紅葉都睇得唔清楚，就響公園行下到此一遊～

遠遠望到名古屋城呢！

既然天黑冇咩睇就決定去下個行程，行番去搭鐵時見到人餵流浪貓～愈來愈多貓貓走出黎呀！

好乖咁～（剛好有街燈，無開flash的）

仲有呢隻白雪雪～

回程先發現出口都夾番古城FEEL喔～

#我的旅遊日記 ＃2016日本中部6天賞楓賞雪之旅 #名古屋 #中部國際空港 #名城公園

黑部立山周遊劵之利用及分享

有人問過我…立山黑部同黑部立山有咩分別? 首先你要知道立山黑部係兩個地方黎, 而阿爾卑斯路線就係將佢地LINK UP! 有各式各樣的交通工具貫穿中間既景點, 有雪山湖泊等等, 的確好值得去! 但立山黑部的費用都唔少, 所以去之前要做定功課點先可以玩得化算呢? 而我做功課既時候都有d阻滯, 以我既行程做個例子～藉此分享下!

富山入? 信濃大町入?

立山入既話要先到富山，而黑部入既話就由信濃大町入，取決由邊度入就視乎你既行程喇。如有睇準備篇既你，就知道今次我既行程係要一日內由名古屋開始完成整個立山黑部既行程，好多人都會先去高山停一晚第2朝先繼續向富山 & 立山黑部出發，但我無時間再響高山停一晚，而且我係鐵道遊，如果富山入的話我就算幾早由名古屋出發都完成唔到立山黑部全個行程，因為由名古屋到富山要４個鐘，於呢條link check，直接輸入預計到達時間就會出曬整個行程, 超方便! http://www.alpen-route.com/tw/courses/scheduling/index.html Check完之後發現信濃大町入既schedule係比富山既夜d完成，而且名古屋去信濃大町只需大概3個鐘，比去富山慳1個鐘，反覆查來查去只有呢個方案可以一天內由名古屋出發而可以完成整個立山黑部行程！ 所以我既行程係：名古屋 > 信濃大町 > 黑部立山 > 富山

PASS或周遊劵之利用

日本絕對係Travel Friendly 既國家，好多鐵路公司或旅遊局都會推出好多不同既PASS或周遊劵方便旅客使用，振興經濟丫嘛！而立山黑部係日本中部既人氣景點，又點會無周遊劵呢！未介紹前先按我既行程睇睇唔用周遊劵時所需既交通費！

去程：JR名古屋 >> JR信濃大町－JPY 4,000 自由席, 指定席+JPY2,680 

立山黑部阿爾卑斯山脈路線 [信濃大町>> 電鉄富山(ONE WAY片道)]－ JPY 10,850 

回程：JR富山>>JR名古屋－JPY 4,750 自由席, 指定席+JPY2,900

以上只係單單由名古屋去立山黑部再返回名古屋既交通費，已經多過2萬yen! 仲未計其他行程既交通費喔～所以真係要好好利用周遊劵, 而呢款就超岩由名古屋出發到立山黑部既旅客 [阿爾卑斯、高山、松本地區周遊券] 5日只係JPY 17,500，除了任搭立山黑部阿爾卑斯路線，連名古屋上富山或信濃大町上都係全包，例如名古屋上富山可以去埋高山，下呂溫泉等，信濃大町上只可停松本！連名古屋市的JR及富山地方鐵路線都是任搭的! 詳情請看連結，要好好利用喔!

http://touristpass.jp/zh-tw/ 呢個網站仲有幾款不同既周遊劵, 如將會去呢D地方都可以考慮使用呀!
順帶提一提這幾款周遊劵係要於日本境外預購～購入方法及地點請參考網頁！

好喇～搵到呢個pass諗住無死啦! 可惜時不與我～細心再睇睇！以～[阿爾卑斯、高山、松本地區周遊券] 使用限期到11月13日(2016年, 每年會有更改)…大佬，我11月18號去wo!! T_T 明明11月30日後先封山，點解只係做到11月13架!!! What the… 晴天霹靂，左度右度，諗過取消立山黑部善用北陸PASS，但阿妹想去，亦諗過照俾原價，又覺得好唔抵，不如下年先？哼～我係唔會咁易放棄既，又喪做功課下天無絕人之路，俾我搵到 [立山黒部アルペンきっぷ]！係JR東海既產物，仲要只有日文版～好絕！睇圖，加有限公司既日文，再上網爬文後，確定可以用呀！唔知點解立山黑部官網無介紹呢款票，anyway 急急眼睇使用限期，係11月30日的～果種開心係想跳起果隻！ 

2016既時候只有兩款，按唔同地區出發就有唔同既票價，而岩岩再睇睇2017已增至4款! 多左唔同地區去立山黑部既利用~~而我用既當然係由名古屋出發那款【ひだコース（高山線・中央線経由）】，承惠JPY18,610 是8日PASS! 同樣是包JR來回特急列車各一程, 買呢款票既時候最好就搵埋搭既時間買埋特急車飛喇!都幾FULL架!無論順向逆向都可以～ 

我用既係:::名古屋市内→富山 信濃大町→名古屋市内

如果去中部北陸地區多過5日，去埋金沢就可以揀【しらさぎコース（北陸線・中央線経由）】，呢款隨時比[高山、北陸地區周遊券]仲化算，因為８日仲要包埋立山黑部阿爾卑斯路線！

呢款JR東海出既PASS可於大站購買，我係響名古屋駅票務購入，買時趕頭趕命趕車，此乃補影相片所以CLOSE～基本上入面既員工都識簡單英文，當然我自己會印定想買既產物，如這次是 [立山黒部アルペンきっぷ]，仲有去程及回程特急車飛既時間目的地，一次過Reserve曬，咁就安心曬～雖則以為自己預早左兩日買無死，少年實在太年輕⋯⋯去程既指定席已經FULL左～但職員話"DIE JOK BU" (無問題)可以照搭，心諗唔係要企兩粒鐘去松本下嘛⋯⋯但因為時間緊湊無退路～去到搭果朝，哦哦～原來有兩卡車廂係自由席，安心曬～當然係first come first serve!

 

分享完畢～大家研究下睇睇邊個比較適合自己既行程吧！

#我的旅遊日記 #2016日本中部6天賞楓賞雪之旅 #周遊劵之利用 #立山黑部阿爾卑斯山脈路線 #黑部立山 #立山黑部pass #立山黑部周遊劵 #北陸周遊劵 #富山 #信濃大町